Кесг цагтан гүүлгәд,
Кемҗл уга гүүлгад,
Балр хар модыг
Арвн хойр хонгт
Әрә гиҗ давб;
Түүнәс цааран гүүлгәд һарв,
Бас кесг цагтан гүүлгәд одв,
Орчлңгин өндр Цаһан уулын белд
Күрәд ирв,
Зеердән сөөҗ оркад,
Көдән чиңгә көк җилңгән сумлад оркв.

Тер уулас маҗ-марл-һулдн
Бууһад ирв.

Җаңһр улан һолынь тас цокад унһав,
Әмҗл нертә элкинь йү татад,
Унһаһад оркв,
Долан җулҗухаг
Унад ирсн бийнь бәрәд авб;
Зурһаһинь түүмрдәд,
Негинь һосна тах дор дүрәд,
Күрл Эрднь хааг
Хәрү зөрв;
Күрл Эрднь хаанд күрәд ирв.

- Күрл Эрднь, бәәнч? - гиһәд дуудв.-
Мини нег селгән болв.

Чини далва деер
Би һарх кевтә болнав,- гив.

Күрл Әрднь келв:
- Шидрә бийм атыҗ бәәлә,
Чамд харһад угадан атыҗ бәәҗв,- гиһәд,
Һарад, Җаңһриг
Хормаһаснь авад,
Хөөнән хөрн җува гүвдәд одв.

Тиигҗ гүвдҗ йовхла,
Барун һосна тах дор
Җулҗуха билц тусад одв -
Күрл Эрднь
Нәәтг улан һолнь тасрад,
Далн һолын мод дарад унв,
Далан олн хадрңд мең хайв.
Җаңһр баһ хатнад ирв,
Арз-хорзин хөөн орв;
Күрл Эрднь гих неринь таслв,
Дуута Җаңһра гих неринь дуудулв,
Иньг көтч, Нарни күүкн
Баһ хатн хойриг ниилүләд,
Нөкр нәәҗнр хойр болһв.

- Эн нутгиг та хойр медтн,- гиһәд,
Эврәннь нутган зөрв.

Дорагшан ордг арһинь ядад йовна.

Тиигә йовн гидг бодхнь,
Теңгс ик далан көвәд
Хан һәрдин үр бәәнә,
Тер үүрт хан һәрдин
Һурвн күүкн сууна.

Тер һурвн күүкиг
Хортын хо һалзн моһа
Меңнн гиһәд ирв.

Җаңһр тер хо һалзн моһаг
Һурвна тас цокад,
Һурвн күүкнд бэрүләд оркв.
Эн һурвн күүкн:
- Әмнь маниг халхлж, һаргсн,
Ачд ач кегсн,
Туст тус кегсн ах,
Мана ээҗ уурта юмн,- гиһәд,
Алтн үр доран дарҗ оркад,
Бултулад суув.

Хан һәрд күрч ирв,
Нег бийдән тавн зун
Буһин мах ачгсн ирв.

[<<][<] [9] [10] [11] [12] [13] [>][>>]