Арнзлын Зеердиг
Саак хатн тавлҗ тохад,
Җаңһрин көлд мөргэд одв.

Делкән шар нарн
Дегҗәд һархдан күрв.

"Һархла, олн-әмтн үзх биший?
Би хаани засгла харһх биший?
Эм күмәр тәвүлҗ һарв гих
Миңһн җилә нерн болх",- гиһәд,
Җаңһр эс мордад бәәв.

Хатн келв:
- Җаңһр, та үүниг
Нанас ядад бәәх кевтәт:
Эн хаана әмнь -
Үүнәсн һарад йовх та,
Эн замин улан хаалһар йовх та,
Балр хар модн болх;
Түүнәс цааран күлг мөрнтн зовҗ,
Көгчн бийтн чилҗ күрх та,
Нег ик цаһан уул бәәх,
Тер уулын ораһас
Нег маҗ-марл-һулдн
Бууһад ирх.

Түүни хәләхәс, һархнь олн.
Түүг хаһад, унхла,
Түүни гесн дотр
Долан җулҗуха бәәх,-
Эн хаана әмн тер.

Тер хатн келв:
- Мини танд ачлдг учр мини,-
Би Нарни күүкн биләв,
Үүнд цецг түүҗ наач йовтлм,
Намаг дөчн дөрвн толһата
Дөлдү хар мус
Зальгад оксн билә.

Та тер муусиг
Дөчн толһаһинь тас цокад,
Эмҗл нертә элкинь йүүләд орклат,
Тер муусин геснәс һарад,
Нар үзсндән таниг ачлнав би…
Җаңһр замин улан хаалһар
Гүүлгәд һарв.

[<<][<] [5] [6] [7] [8] [9] [>][>>]