Көвүн одад келв:
- Эм күүнд учран келдг,
Күүнә үрн бишв би,
Көвүн бийдчн кедсүв,
Хатнас шаңган авад ир,- гив.

Хатн зәрлг болв:
- Дөчн дөрвн буруһичн өңгрүлсв,
Һучн һурвн эрлһичн өгсүв,- гиһәд,
Көвүг дәкәд тәвб.

Көвүн Җаңһрт ирәд келв.

Җаңһр зәрлг болв:
- Дор Бумбин орни
Догшн Җаңһр гидг күн биләв,
Адуг мини авад ирхләнь,
Ардаснь некәд иргсн
Бий мини тамин зовлң
Үзүлҗ бәәгснь эн.

Хатнд көвүн ирәд келв:
"Үзңгин өнчн Җаңһр гидг
Күн би",- гинә гиҗ келв.

Хатн соңсад,
Харңһу болхла,
Хар болд хәәчән ханцлад,
Җаңһрт гүүһәд ирв.

Хар болд күләһинь хәәчләд тәвб.

Җаңһр келв:
- Әм күмәр тәвүлҗ һарв гих
Миңһн һалвин нерн болх,
Күддг болхнь күл,
Эс күлдг болхнь,
Нанла хамдан тамин зовлң
Үзх чи,- гив.

Хатн өмнәснь келв:
- Эмәл, хазартн, зер-зевтн
Ик хатна дер дор,
Хаана зергд.

Күрл Эрднь хан,
Тер хан хүвлһтә:
Нег нүднь унтад,
Нег нүднь серүн бәәдг;
Сөөни өрәл күртл
Өрәл бийнь унтад,
Өрәл бийнь серүн бәәдг;
Эн хаана зергәс
Зер-зевитн авч ирнәв,-
Гиһәд һарад одв.

Һазаһурн нәәмн миңһн
Шулм манлһта
Күрл Эрднь бәәдг;
Хатн нәәмн миңһн
Шулмиг билг адын тәрнәр унтулад,
Хаанд ирәд шаһав.

Билг адын хар тәрнәр
Күрл Эрдниг
Маңһдур үд күртл серш уга
Балр хар нөөртнь унтулв.

Зер-зев, эмәл, хазар үүрәд һарв.

Үүрәд һархларн, дуулад һарв:
"Эр мөрни Зеерд
Нутган эс сансн болхлачн,
Эр күмн Җаңһр
Нутган санв би".

Үүдн чигн уга, өрк чигн уга
Һурвн давхр төмр гертә,
Тәк хулын күләтә
Тамин һурвн чөдртә бәәгсн
Зеерд соңсад оркв:
Тас тиирәд оркв,
Тәк хулынъ тасчад оркв,
Ташр тиирәд оркв,
Һурвн давхр төмр герән
Тас тиирәд оркв,
Нәәтг Җаңһртан гүүһәд күрәд ирв.

[<<][<] [5] [6] [7] [8] [9] [>][>>]