Арг Улан Хоңһр ахта
Дөрвн көвү
Алдр Җаңһран
Дөрвн үзг талан хәәҗ ядв.

Ядхларн ар Бумбин оран зөрв,
Зөрәд хәрв;
Җаңһрадан күрч ирәд,
Хоңһр ар Бумбин оран Батлҗ оркад,
Алдр Җаңһран хәәһәд һарв...
Җаңһриг деед Бумбин орни
Күчтә Күрл Эрднь хан
Хоңһрин ду соңсад,
Хан һәрд болҗ хүвләд,
Деед Бумбин орндан авад одв;
Күүни көврдгин чиңгә
Күрл болдар хасг төмр тергнлә күләд,
Нәәмн миңһн шулмин һарт өгв;
Өдр дундан нәәмн миңһ цокад,
Нәәмн миңһ цольгад бәәв;
Әмсхлд арвн хойр тамин зовлң
Җаңһр үзв;
Ар Бумбин орн
Зүүдн болад,
Арг Улан Хоңһр
Күсл болад бәәв.

Тер күчтә Күрл Эрднь хан
Һурвн хатта;
Җаңһр келв:
- Нәәмн миңһн шулман
Цольгн гиһәд ирхлә,
Нәәтг улан һолд мини
Күрәд ирв,
Күрл Эрднь хаандан харһултн,- гив.-
Бийән алҗ яда бәәхнь,
Хаанла харһул гидг! - гиһәд,
- Цольг! - гиһәд, күрәд ирв.

Күрәд ирхләнь,
Хар болд күләһән тасчад,
Хәәкрәд, Күрл Әрднь ха
Темцәд гүүв.

Күрл Эрднь хаанд ирәд,
Бурхн хар толһаһарн
Бумин негәр мөргәд медүлв:
- Тавн җилә татлһан өгсүв,
Арвн җилә алван өгсүв,
Ар Бумбин орн талм тальвтн! - гиһәд мөргв,
- Ховшгсн-товшгсн
Хорн элмриг күл! - гигсн бәәнә.
Җаңһр келәд һарв:
- Мини нег хөв угав?
Мини нег селгән угав?
Чини далва деер
Нег һарч болх биз! - гиһәд һарв.

Хасг төмр тергнд
Нәәмн миңһн шулм дәкәд күләд цольгв.

Күләһәс һагцхн
Хумха хурһн сул һарв,
Түүгәрн цур татв;
Ар бумбин оран орулад
Цуурдад бәәнә...
Күрл Эрднин баһ хатн -
Нарни күүкн,
Тер цууринь соңсад,
Иньг гидг көтчән:
- Эн күүни нер авад ир! - гиһәд илгәв.

Иньг көтч ирәд,
Җаңһрас сурв:
- Мана нарни күүкн - баһ хатн
"Аль Бумбин орни
Кен гидг күүнә
Көвүм чи? - гиҗ,-
Нерән ас",- гилә,
- Тамин олн зовлң
Үздг болв чигн
Эм күүнд учран келдг
Күүни үрн бишв би.

Көвүн бийдчн келсүв.
Хатнас шаңган авад ир,- гиһәд,
Көвү тәвб.

[<<][<] [5] [6] [7] [8] [9] [>][>>]