Арг Улан Хоңһр
Хашң Көкән һуйдад дахв.

Алтн Чееҗ
Агсг Уланан һуйдад дахв.

Хөрн тавн алд
Хурдн Буурл мөрән һуйдад,
Хүвлһтин Хавтын Өңг бий дахв.

Күнд Һарта Савр
Күрң Һалзнан һуйдад дахв.

Халун Бумбин орнасн
Хәр Бумбин ор зөрх
Богд ахта тавн көвүн
Тавта зеерд адуни мөрт орв.

Медәд уга найн хойр
Зандн һолан һатлв,
Медгсн найн хойр
Зандн һолан һатлв,
Эрдмтә Зандн уулар
Эргәд орхин алднд
Арин дөрвн көвүнәс
Арнзл Зеерд алдулад одв;
Бас чигн кесг цагтнь
Хурдлулад оркв,
Тәвн хойр салата
Тавцң Зандн уулын өргәр
Өөд дүүвр Зеерд һарад ирв.

Эзн богд нойн
Ард талан харна,
Хар баран уга;
Өмн талан харна,
Харан-баран уга;
Арнзлан һуйдад гүүлгв,
Арин дөрвн көвүнә
Хараһинь алдад,
Һурвн долан хонг гүүлгв,
Хәәрхн Цаһан уулын өргәр
Өөд һарад ирв;
Өмн талан харна,
Харн гидг болхнь,
Адуна хараһинь авад окв.

Көөрк зеерд адуһинь
Күүкн Цаһан теңгст услад,
Дөрвн бирмн тууҗ йовна.

Арднь көдән чиңгә
Көк Һалзн күлгтә
Күчтә Күрл Эрдни хан
Арднь тал хах һазр һагцар йовна.
Эзн нойн богдын
Куңк цаһан ухан
Будн болад. Күнд зандн толһа
Дүүң болад,
Арнзлан һуйдад,
Әгр зандан бәрәд
Ордг болхнь,
Ар Бумбин орндан
Зүүдн болхан санв,
Арг Улан Хоңһртан
Күсл болхан санв,
Адуна хараһинь алдад,
Арвн хойр хонгт
Әәһәд суув.

Хашң Көкән һуйдгсн
Арг Улан Хоңһр ардаснь:
- Богд, харан-баран угай? - гиҗ ирв.

- Адунаннь бараһинь узәд,
Арвн хойр хонг
Әәһәд суув би,- гив.

Хоңһр чишкәд одв:
- Арнзлан унҗ йовҗ,
Әгр зандан бәрә йовҗ,
Ардан Арг Улан Хоңһр ахта
Дөрвн көвүһән дахула йовҗ,
"Әәһәд суув би",- гих,-
Миңһн һалвин нерән яһс гивч?
Арнзлын Зеердим ас! - гив.

Алдр нойн Җаңһрин
Дотадын долан түмн сүрә дөгәд,
Һазадын нәәмн түмн сүрә бульглад,
Зеерд деерэн һарв.

Зеерд адуни мөрт орад җиңнв;
Керә җирн зурһан һорькин ард
Кемҗән уга дарв.
Арнзлын Зеерд кесг цагт
Хурдлад оркв,
Көөрк Зеерд
Адунаннь хараһинь авад өгв.

Арнзлан һуйдад,
"Баатр Бумбин Шарт зандн"
Ура дуудад дәврв.

Өмнәснь
Күрл Эрднь хан
Көдән чиңгә Көкән һуйдад дәврв.

Эзн нойн богд
Далыннь герлд
Далн хойр дарад оркв,
Давхрлҗ өмсгсн
Далн давхр
Дәрв шар цоохр лувцин
Далн хойр шар алтн товчинь
Мөлтртлнь цокв.

Далвлзгсн Зеерд
Далн хойр бухад өңгрв.

[<<][<] [1] [2] [3] [4] [5] [>][>>]