Асхни үдин алднд
Арвн һурвн тергн алтан
Эмгн өвгн хойрт күргв,
Эмгн өвгн хойр
Усч түләч хойран бәрәд,
Җирһәд бәәв.

Тер Алтн Гүргү хаани нутг
Цаһан күдр Шар Маңһсин орнд
Җилин һурвн миңһн күүк,
Һурвн миңһн көвү өгдг санҗ.

Тер күдр Шар Маңһсин орнас
Өңг Цаһан бөк ахта
Тавн зун күн ирҗ,
- Өгдг һурвн миңһн
Күүкн көвүн хойран ас!
Эс өгдг болхнь,
Эн бөктә ноолд! - гиҗ илгәҗ.

Алтн Гүргү хаана орн
Күүкн көвүн хойран өгхәр цуглулв.

Тер хоҗһр көвүн хаанд одв.

- Эн көвүн күүкн хойран
Цуглулад өгәд бәәхәр,
Ән бөкләнь нег көвү
Ноолдулхнтн,- гив.

- Күмн ноолдж,
Болх юмн биш,
Аһу күчтә юмн,- гив.

- Тана сәкүснд зальврад,
Үүнлә би ноолднав! - гив.

- Не, көвүн, ноолд! - гив.

Хан Өңг Цаһан бөкд келүлв:
- Маңһдур һал үдлә ноолдх болҗ,
Бийән ясҗ бэ,- гиҗ келүлв.

Өңг Цаһан бөк:
- Хәрҗ бәәх күүнд
Нег өдрин зог,- гиҗ,
Тачкнҗ инәҗ бәәдг.

Маңһдур һал үдлә
Эн хойр көвүн
Ноолдхин селгән болв.

Хоюрн
Тәкин арсн шалвран
Тәкм талан шаңхаглад,
Буһин арсн шалвран
Бульчң талан шаңхаглад,
Таш-баш бәрлдв;
Ташр-башр өрглцәд,
Өңг Цаһан бөкиг
Баатр Җаңһр
Хойра шу татад,
Хойр бух талнь хаяд оркв.

Эн хоҗһр көвүг
Алтн Гүргү хан хәәрләд,
Мөңгн Герл гидг көвүндән
Шин көтч кеһәд өгв.

Кесг үдү-түдү болад бәәв.

Шин көтч Мөңгн Герлд келв:
- Агтын тарһнд һазр тань гидг,
Эцкин әмдд кү тань гидг,
Нег арвн көвүн
Зуулч йовад ирий,- гив.

Мөңгн Герл ахта арвн көвүн
Агтын тарһнд һазр таньхар,
Эцкин әмдд кү таньхар
Һарад йовб.

Кесг чигн цагтан зүүләд йовб,
Кесг дала һатлад,
Кесг уул давад,
Арвн күлг эцтл йовад авб.

Тиигҗ йовад,
Адуни хараһинь авгсн,
Арта Цаһан уулан таняд окв.

Түүнәсн цааран зүүләд йовб.

Тәвн хойр шилтә
Тавцң Зандн уулан таняд оркв.

Түүнәсн цааран зүүлн гив.

- Шин көтч, үүнәсн хааран? - гиҗ,
Мөңгн Герл сурв.

- Тер нег сәәхн хаани орн бәәнә,
Түүг үзәд хәрий,- гив.

- Тиигий! - гиһәд, һарад йовб.

Бас кесг йовад оркв.

Бумбин Цаһан уулнь үзгдәд,
Бумб гидг дала үзгдәд,
Бумбин Цаһан өргә үзгдэд ирв.

Баатр Җаңһр улм
Җуург му көвүн болҗ хүвләд,
Мөңгн Герл нойна
Барун ам татад бәәв,
Мөңгн Герл ахта
Арвн көвүн цувад оркв.

Орад суув.

Деед бийднь хәләхнь -
Дөчн дөрвн көлтә ширә деер
Һунхн наста Шавдл хатн -
Эццн цаһан эмгн сууна.

Ундн-юуһинь хаңһав,
Учр-юуһинь сурв.

[<<][<] [9] [10] [11] [12] [13] [>][>>]